سرعة الغالق

shutter9

أسماء أخرى

وقت التعريض٬ سرعة الغالق٬ shutter speed –  شتر سبييد

سرعة الغالق  يتم التحكم بها من الكاميرا ويعتبر أحد مواصفات الكاميرا

يعني إذا بتشتري كاميرا تحصله موجود في أحد الخيارات

بس إذا بتشتري عدسة ما تسأل عن وقت التعريض أو سرعة الغالق حقها أو الشتر حقها كم !!  اللي في المحل رح يقول وش يبي هذا !!

دائماً تحصله مابين ١/٤٠٠٠ إلى ١٥ أو ٣٠ ثانية – بس ترا هالشيء موجود في ٩٥٪ من الكاميرات وكلها تتشابه في المدى هذا

رح نفهم مع بعض

وقت التعريض

اسمه في الأساس اكسبوجر تايم

Exposure Time

بس رح اسميه الشتر سبيد أو الشتر

الشتر هو الوقت اللي يفتح فيه الغالق ويسمح بمرور الضوء ويقفل عليه داخل الحساس

طلاسم ادري حتى أنا ما فهمت

بس خلونا نتخيل مع بعض

فيه باب داخل الكاميرا يفتح ويصك بسرعة

وفيه واحد متخبي ورى هالباب يبي يشوف اذا انفتح الباب وبيلقط أي شيء تطيح عليه عينه

الباب هو الغالق

اللي متخبي هو الحساس

وسرعة فتح الباب وتسكيره هو الشتر سبيد

شكل الغالق في الكاميرا ؟

قلنا لكم باب .. بس باب شكله يختلف شوي

Shutter HD [ دروس تصوير ] الدرس رقم ٢   سرعة الغالق

ماذا يرمز للشتر ؟

يرمز له بالثواني بشكل عام

يعني ١/١٠٠ ثانية (معناها الغالق بيفتح وبيسكر في جزء من ١٠٠ جزء من الثانية)

١/٦٠ ثانية (معناها الغالق بيفتح وبيسكر في جزء من ١٠٠ جزء من الثانية)

١/٤ ثانية أو ربع ثانية (معناها الغالق بيفتح وبيسكر في ربع ثانية)

١” ثانية (معناها الغالق بيفتح وبيسكر بعد ثانية)

١٠ ثواني (معناها الغالق بيفتح وبيسكر بعد ١٠ ثواني)

… الخ

وين أشوف الغالق أو الشتر سبيد في الكاميرا ؟

الشتر سبيد موجود على شاشة الكاميرا

ويعذرونا مستخدمين سوني وفوجي وباناسونيك ما حطينا لهم مثال

shutter2 [ دروس تصوير ] الدرس رقم ٢   سرعة الغالق

الرقم ٦٠ معناها ١/٦٠

بس اذا طلع لنا رقم زي ٤” أو ٢” ،،، معناها انه ٤ ثواني أو ثانيتين

تأثيير الشتر على الصورة

يأثر الشتر سبيد أو سرعة الغالق على الصورة في شغلتين

١- كمية الإضاءة ـ وهذا شيء مشترك في كل عوامل مثلث التعريض

٢– تثبيت الحركة

كل ما كانت سرعة الغالق أسرع كل ما كان الضوء اللي يدخل أقل

وكل ما كانت سرعة الغالق بطيئة كل ما زاد الضوء اللي يدخل للحساس

يعني

لو صورنا صورة والغالق ١ ثانية

وصورة ثانية الغالق ٤ ثواني

اللي بتكون إضاءتها أكثر هي الصورة أم ٤ ثواني

مثال ثاني

لو صورنا صورة والغالق ١/١٠٠

وصورة ثانية الغالق فيه ١/٢٠

اللي بتكون إضاءتها آكثر هي الصورة أم ١/٢٠

بيجي واحد الحين ويقول .. أجل بخليها دائما أبطأ شيء

طبعاً لا

ليه ؟

أول شيء .. يمكن أبطأ شيء يكون إضاءة زايدة

وكلنا في التصوير ندور إضاءة موزونة

بيجي خوينا ويقول .. أجل بخليها دائما أبطأ شيء موزون

طبعاً لا .. مرة ثانية

ليه ؟

فوق قلنا .. سرعة الغالق تساعد في تثبيت الحركة

والحركة نوعين .. حركة الكاميرا وحركة الجسم المصور

لو خلينا سرعة الغالق على ١٠ ثواني وجينا نصور طفل أو واحد يلعب كورة .. بتكون النتائج جداً سيئة

لأنه خلال فتحة الغالق وتسكيرته .. محد ثابت لك

حتى لو استخدمت حامل

لأن الحامل يثبت الكاميرا ما يثبت الجسم المصور

يمكن هالصورة توضح موضوع الحركة

shutter9 [ دروس تصوير ] الدرس رقم ٢   سرعة الغالق

طيب كم السرعات المعروفة والمستخدمة دائماً ؟

مافيه .. يعتمد على الشخص وتجربتك الخاصة

الأشخاص اللي جالسين ويتكلمون ..وفيه احتمالية حركة يد بسيطة

نستخدم معهم  سرعة غالق ماتقل عن ١/٤٠

واذا الحركة أكثر

نزيد السرعة ونستخدم ١/٦٠ أو ١/٨٠

إذا الدعوة مطامر وركض نستخدم ١/١٦٠ أو ١/٢٠٠

فيه أحيان كثيرة نبي نصور اللي قدامنا وتطلع الصورة مهزوزة

ويكون اللي قدامنا متصنم وما يتحرك أو انه هو من جد ما يتحرك زي وردة/عطر/عمارة

بس مع كذا تطلع الصور مهزوزة

والمصور عارف ان الاهتزاز صار بسبب حركة يده

الحل وقتها انه يالمصور ستخدم حامل أو يعدل في العنصرين الثانين من عناصر مثلث التعريض

يا فتحة العدسة أو الآيزو

 مقلوب البعد البؤري

أحياناً يكون المصور يصور صورة بسرعة غالق ١/١٠٠ وتطلع الصور مهزوزة.. مع انه قاعد يصور جدار !!

مستحيل الجدار يتحرك ومستحيل اهتزاز اليد يأثر !

وين الاهتزاز صار أجل ؟

نروح نسأل المصور عن العدسة اللي استخدم وأكيد بنلقاه يستخدم عدسة تيلي فوتو ( زووم ) وبعدها البؤري مثلاً ٤٠٠ مم

وقتها نقول له الله يخليك ثاني مرة استخدم شتر سبيد أقل شيء ١/٤٠٠

وهذا هو مقلوب البعد البؤري ويهدف الى تجنب اهتزاز الكاميرا نفسها

إذا العدسة بعدها البؤري ١٠٠ نستخدم سرعة غالق ١/١٠٠

إذا البعد البؤري ٥٥ نستخم سرعة غالق ١/٥٥ أو أسرع

إذا البعد البؤري ١٨ نستخدم سرعة غالق ١/١٨ أو أسرع

بعض من النماذج

Shutter3 [ دروس تصوير ] الدرس رقم ٢   سرعة الغالق

نشوف في الصورة اللي فوق كيف تجميد الحركة والسبب استخدام سرعة غالق سريعة جداً وهي جزء من ٢٠٠٠ جزء من الثانية

 الإضاءة كانت طبيعية ( شمس ) وكافية جداً عشان كذا ما ظلمت الصورة

Shutter4 [ دروس تصوير ] الدرس رقم ٢   سرعة الغالق

أنا اعتبر المصور هنا خرج عن المألوف وصور لنا الساعة مع حركة عقرب الثواني.

تقدرون تعرفون الشتر سبيد من عدد المرات اللي وقف فيها العقرب.

Shutter5 [ دروس تصوير ] الدرس رقم ٢   سرعة الغالق

هنا تجميد رائع للحركة

Shutter6 [ دروس تصوير ] الدرس رقم ٢   سرعة الغالق

المصور براين استخدم شتر سبيد ٤ ثواني عشان الكاميرا تسجل كل الحركات الحاصلة خلال الـ ٤ ثواني

كان يستخدم حامل ثلاثي أكيد والا كان لقينا كل شيء مهتز

في الصورة نفسها .. كل شيء كان ثابت ما عدا الموية

فالكاميرا سجلت حركة الموية مع بقاء الأجسام الثابتة .. ثابتة

طبعا مع زيادة سرعة الغالق راح تظلم الصورة

خصوصاً إذا ما كان عندنا مصدر إضاءة قوي نقدر نتحكم فيه – مثل صورة الفهد

وقتها نبدأ نغير في الخيارات الثانية اللي هي فتحة العدسة أو الحساسية

فيه سؤال دايما يتردد ..

أبي أصور صورة مهيب مهزوزة بس ما أبغى أغير في الاعدادات كثير

الجواب :

نحط الكاميرا على مود ( أولوية الغالق)

يرمز له في كاميرات كانون بحرف Tv

وفي كاميرات نيكون بالحرف S

Shutter7 [ دروس تصوير ] الدرس رقم ٢   سرعة الغالق

أول ما نحط الكاميرا على هذا المود.. الكاميرا تسوي الإعدادات حقت فتحة العدسة

بس المطلوب منك كمصور تعرف الشيء اللي قدامك وش الغالق اللي يجمده

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s