العين البشرية دقتها كم ميغا بيكسل؟!

 فرضا رح نسوي كاميرا دقتها نفس دقة العين البشرية

*كم ميغا بيكسل يبيلها عشان تضبطها؟

*وايش كثر مساحة الصورة اللي تخزنها العين إذا نبي نحسبها بالميغا بايت؟

أول شي لازم أوضح ان العين البشرية  تختلف كثير في تركيبتها وطريقة شغلها عن الكاميرات الرقمية اللي عندنا هالأيام، يمكن بس من ناحية الفكرة الأساسية متشابهين أما الباقي فرق كبيييييرررر والجزء الأكبر من الاختلاف يرجع للمخ البشري والدور اللي يلعبه في عملية النظر.

مع هذا اذا حاولنا نتجاهل كل شي مختلف، وقرّبنا الافتراضات، واعتمدنا بعض الأرقام التقريبية، يقولون الظاهر أقرب جواب هو 576 ميغا بيكسل!

بس لحظه لحظه! الاختلاف بين العين والكاميرا شوي يغير من هالرقم…

*وكيف هذا؟ 

الجواب محسوب من عدد المستقبلات العصبية في الشبكية اللي يوصل 5 ملايين مستقبل مخروطي (cones ) و 120 مليون عصية (العصية – rod ) تترجم تباين الألوان ولها دور كبير في توضيح “حدة” الصورة – Sharpness.

بس تركيبة المستقبلات الضوئية في الكاميرات موزعة بصورة متساوية على قطعة صغيرة مربعة، أما المستقبلات الحسية في العين عشوائية وتتدرج في نسبة تركيزها كلما تروح إلى مركز العين، فبكذا لما تشوف بالعين تشوف الواضح بس بالنص والأطراف تلقاها ضبابية، هذي صور توضيحية تبيّن الفرق:

هالكلام يعني الملايين من المستقبلات العصبية في شبكية العين ما تقدر تحسبها كلها انها فعاله 100% في عملية النظر.

يعني يقولك اذا تبغي تحسب الدقة الفعلية النهائية مع هالتوزيعه للمستقبلات العصبية يمكن تصير دقة العين بس 50 ميغا بيكسل لا غير! ،، لا واحتمال كبير أقل من هالرقم.

زيد على الاختلافات الكبيرة انك تشوف بعينين، يعني عدستين مو عدسه وحده ، وطريقة شغل العين تشابه تصوير الفيديو أكثر من اللقطات الثابتة.

العين تلتقط صورة متواصلة وتتحرك محتوياتها وزواياها باستمرار و تتحدث الصورة بالتغييرات المتسلسلة، كله تحت إشراف الـBig Boss اللي هو مخك اللي يعني المفروض يكون براسك بس ما تدري عنه! سبحان الله.

أكبر اختلاف في الموضوع كله ان عملية “النظر” جزء كبير منها يصير في القشرة البصرية في المخ، العين بس تستقبل جزء من الصورة والمخ يخليك تقراها وهو من نفسه بارك الله فيه يملأ الفراغات العميا في النظر  وبأشياء مرات تكون خطأ مو على حقيقتها. هالفراغات اللي يعبيها نفسها اللي يسمونها الخدع البصرية، لما تكون في صورة انت منتبه للخداع البصري بس لما تمشي وتقوم وتقعد في حياتك اليومية ومشاويرك فعلياً انت على طول قاعد تشوف بالعين نفسها وعملية الخداع البصري موجودة في أشياء انت مو منتبه عليها.

حتى الألوان مرات المخ يخليك تقراها مختلفة عن حقيقتها

القصد من كل هالحكي ان عملية النظر البشرية تختلف بكثير عن طريقة عمل الكاميرا الرقمية، عشان كذا حساب دقة الميغا بيكسل شي مو عملي وغير دقيق، يعني سواءاً كانت العين 576 ميغا بيكسل أو 50 ميغا بيكسل فعلياً ما نحس بهالرقم وقيمته، عكس الكاميرا لأنها تشتغل بطريقة مبنية على هالمقياس والرقم يعكس شي ملموس فيها.

*زين طيب كم يوصل حجم الصورة اللي تلتقطها العين اذا نبي نحسبها بالميغا بايت؟ 

مع مراعاة الاختلاف الكبير في الحسابات والمعطيات نقول تقريباً الصورة اللي مدتها ثانية وحده تلتقطها العين تساوي أكثر من 10 غيغا بايت من البيانات تروح للمخ لترجمتها. هذا بس عشان يصير عندك فكرة قد ايش المخ البشري عجيب سبحان الله طول اليوم يشوف ويستقبل البيانات وفوقه يساعدك تتكلم وتتحرك ويتحكم بجسمك وما يتعب.

هالموضوع ذكرني بموضوع مساحة المخ البشري بالغيغا بايت. واذا كنت تشوف ان الصورة للثانية الوحده حجمها كبير وتخلص مساحة مخك اقول لك تطمّن لأن معظم البيانات اللي توصل من الصورة تنحذف بعد قراءتها وما يبقى إلا نتيفات لا غير، إلا اللهم إذا كنت مركز ومندمج وقاعد تذاكر مثلاً ومنتبه عقلياً ونفسياً. وطبعاً مع العمر كثير من الأشياء يحذفها مخك عشان يوفر مكان للذكريات أحدث.

الكاتبه | يارا القريني

YaraAlGoraini@

Advertisements

2 thoughts on “العين البشرية دقتها كم ميغا بيكسل؟!

  1. صراحتن شيء عجيب،
    لا نملك الا ان نقول سبحان الله والحمد لله

    مقال في قمة الروعة، والاروع اسلوب الطرح
    حسيت انو واحد قاعد معاي يسولف لي O_o

  2. مقــآل جمييييييييييل و آلآسسلوب آجممل !
    و سبحآن الله دآيمآ هـ السؤآل يخخطر فـ بالي و آخيرآ لقييت آجابه منطقيية جدآ لهه =)
    سلمت آناملكم ع الطرح القييم و المميييز جدآ !!!
    و سبحآنك ربيي ما ادق صنعك و خلقك !!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s